PA BIBUFIKA SANTIAGU
Serenata pa Eury
N ka sta pertu
N ka sta longi-l kau ki N ka sai
Y dja-n dia ta kuda
Ta odja sai ki fika N ka bai
Sta é lemi ki ta lumi-m ki ta lapi-m gana fika
Sima briu é xeia baziu pa atxa k’atxadu inda
Sima sta na orela pé di bai odju ta striba ku fika
Na pó di indiferensa lapidu verdi dor ta pinga
Na nha prestu txon nta bibufika Santiagu.
N ka sta pertu
N ka sta longi-l kau sen kau sta
Y dja-n dia ta kuda
Ta odja sta ki fika N ka sta
Sima sin di li-sin-sin ki nega nega-negadu
Sima fladu ki ka fla ki fika fla ki fladu fla
Sima sin di nau ki nau di sin ki fika sin
Pabia… Santu!
É séu rendedu na forsa dun djátu
Pa raiba klaria maldison di ferru gaitadu
Na nha prestu txon ta bibufika Santiagu.
Demu …Tiagu!
É dondágu na kukuruta di Pik’ Intóni
Pa pozentu di moenga dimoniadu
Na nha prestu txon ta bibufika Santiagu.
Praia, 08-Nov-2006
Kaka Barboza
